<bgsound src="sher.wav" loop="infinite">
 
بیروڕا‌
بێ ویژدانی راگەیاندنی لایەنی دەسەڵاتدار..!
عیرفان ئەحمەد کاکە مەحمود


بێ ویژدانی راگەیاندنی لایەنی دەسەڵاتدار..!

عرفان أحمد كاكه محمود

هەموو ساڵێك لە ساڵیادی راپەرینی جوامێرانەی گەلی كوردی موسوڵماندا سەرجەم لایەنە سیاسییەكانی كوردستان ئەو یادە بەرز را دەگرن و بەرنامەو قسەو گفتوگۆ زۆرێك لەو بارەوە دەكەن.. بەڵام ئەوەی من هەستم پێ كردووەو بە ئاشكرا زوڵم و بێ ویژدانی دەبینم بە تایبەت لە راگەیاندنی هەردوو حیزبی دەسەڵاتدار، ئەوەیە كە هەرلایەنەو بەلای خۆیدا ئەم یادە پڕ لە شكۆیە كە ئێستا هەموولایەك بەرهەمەكەی دەخۆین و بەو بۆنەوە چەند ساڵێكە گەلی كوردی ستەملێكراو حەساوەتەوەو سوپاس بۆ خوا نیعمەتی ئەمن و ئاساییش و ماددەی بەسەر ئەم گەلەدا رشتووە.. بۆیە پێویستە دوای سوپاسی بێ پایانی خوای باڵا دەست و شوكرانە بژێری بە كردار بۆ ئەو خوایەی كە ئەم نیعمەتانەی بەسەردا رشتووین، حەقەو پێویستە لە راگەیاندنەكاندا باس لە ماندووبوون و ئەزیەت و ئازاری هەمو لایەنەكان بكرێـت و تەنها بە باڵای دوو لایەن و دووكەسدا ئەم بەرهەمەی راپەرینە مەزنە دا نەبڕن.!! زۆرم پێ سەیرە  چەند رۆژێكە راگەیاندنی هەردوولا تەنها وتاری سەركردەكانیان لێ دەدەن لە سەردەمی شاخداو نەوەی ئێستا وا تێدەگەیەنن كە تەنها ئەو دوولایەنە وجوودیان هەبووە.. راستە ئەو دوولایەنە عەزیەت و ئازاری زۆریان لەو پێناوەدا چەشتووەو ماندوو بوون، بەڵام ئەی نابێ لە كەناڵەكانیاندا باسی ماندووبوونی كەسانی تری سەرجەم لایەنەكان باس بكرێن و لە راگەیاندنەكانیاندا باسیان لێوە بكەن، هەموو خەڵكی كوردستان شایەتی ئەوە دەدەن كە جەنابی مامۆستا مەلا عوسمان عبدالعزیزی رەحمەتی لەگەڵ ئەو هەموو بارودۆخە ناهەموارەدا فەتوای جیهادی راگەیاندو دژی رژێمی بەعس بە خۆیی و مامۆستایانی تری وەك شێخ عەلی عبدالعزیزو مامۆستا ئەحمەد كاكە مەحموودو مامۆستا مەلا عەلی بیارەو شێخ محمدی بەرزنجی و شێخ صدیق سەرگەتی و بە دەیان و سەدان مامۆستاو كەسایەتی تر لەو شۆرشە ئیسلامییەدا بەشداربون، وە لەسەرجەم راپەرینە مەزنەكەی كوردستان بەشدار بوون و بێ خۆ دزینەوەو تاڵان و دزی كردن.. تا كەركوكی دڵی كوردستان حزبی بەعسی عەلمانییان شار بەدەر كردو چەندین شەهیدی جوامێریان بە ئیسلام و نەوەی ئێستا بەخشی.. بەڵام بەداخەوە بۆ یەك ساتیش باسی ئەو مێژووە زێرینەی مامۆستایانی ئایینی ناكرێ و خوا نەكا وا دەزانن تەنها ئەم ئازادیی و خۆشگوزەرانییە هەموو بەخوێنی ئەوان هاتووەتە دی.. بۆیە ئینساف و حەق ویژدان ئەوەیە كە لە راگەیاندنەكاندا باسی مێژووی زێرینی سەرجەم ئەو لایەنانە بكرێ كە بەشداری بەرچاویان هەبووە لەو راپەرینە شكۆمەندەدا..


   ‌ 3432 جار خوێندراوه‌ته‌وه‌
07/03/2016
Facebook Twitter Print Addthis

12
هه‌موو مافه‌کان پارێزراوه بۆ ماڵپه‌ڕی مامۆستا مه‌لا ئه‌حمه‌د کاکه محمود - ساڵی دامه‌زراندن: 1428 - 1439 / 2008 - 2018
Create By: Telerik For IT Solutions
Facebook