<bgsound src="sher.wav" loop="infinite">
 
ژیاننامه
باسی چواره‌م: پۆسته‌ بانگخوازییه‌كانی‌ مامۆستا

باسی چواره‌م

پۆسته‌ بانگخوازییه‌كانی‌ مامۆستا

 مامۆستا مه‌لا ئه‌حمه‌د كاكه‌ مه‌حموود "به‌ره‌حمه‌ت بێ" له‌ داوی‌ وه‌رگرتنی‌ بروانامه‌ی‌ زانستی‌ شه‌رعی‌ و ته‌واو كردنی‌ په‌یمانگای‌ ئیسلامیی هه‌ڵه‌بجه‌، هه‌ست و دركی‌ به‌وه‌ كرد كه‌ ئه‌و ئه‌مانه‌ته‌ گه‌وره‌یه‌ی‌ سه‌ر شانی‌ زۆر له‌وه‌ گه‌وره‌ تره‌ چاوه‌رێی دامه‌زراندنی‌ فه‌رمی‌ حكومه‌ت بێ.! بۆیه‌ له‌ ساڵی‌ 1971 زایینی‌ ده‌چێته‌ گوندی‌ "شیره‌مه‌ڕ"و له‌وێ مزگه‌وتی‌ گونده‌كه‌ ئاوه‌دان ده‌كاته‌وه‌، بانگخوازی‌ ئه‌و سه‌رده‌مانه‌ تا ئه‌ندازه‌یه‌ك سه‌خت و چاوكراوه‌یی ده‌ویست، چونكه‌ خه‌ڵكانێك هه‌بوون كه‌ به‌ ئاشكراو به‌ ڕوونی‌ دژایه‌تی‌ بوونی‌ خودایان ده‌كردو ره‌خنه‌ی‌ نا به‌جێیان له‌ ئیسلام ده‌گرت، له‌ ڕاستیدا مامۆستا ئه‌حمه‌د بوێرانه‌و شاره‌زایانه‌ له‌ ئاست ئه‌و دژایه‌تیی و ته‌حه‌دایانه‌دا بوو.! هه‌ر وه‌ك وه‌فایه‌كیش هه‌میشه‌ مامۆستا ئه‌حمه‌د ئه‌وه‌شی باس ده‌كرد كه‌ ئه‌وكاته‌ی‌ ئه‌و له‌ گوندی‌ "شیره‌مه‌ڕ" بوو، مامۆستا ئیبراهیم رێشاویش له‌وێ بووه‌ و باسی ئه‌وه‌ی‌ ده‌كرد كه‌ چه‌نده‌ به‌ شه‌رم و به‌ حه‌یاو نه‌رم و له‌سه‌رخۆ بووه‌، وه‌ سه‌رسام بوو به‌ شێوازی‌ بانگخوازیكردنی‌ بۆ ئیسلام.. خوا لێیان خۆش بێ.

- پاشان دوای‌ ئه‌وه‌ی‌ مامۆستا ئه‌حمه‌د كاكه‌ مه‌حموود ناوی‌ دێته‌وه‌و به‌ فه‌رمی‌ له‌لایه‌ن ئه‌وقافه‌وه‌ داده‌مه‌زرێ،  له‌ كۆتایی ساڵی‌ 1973 زایینی‌، هه‌نگاوی‌ یه‌كه‌م و ناو هاتنه‌وه‌كه‌ی‌ له‌ گوندی‌ (بناوه‌سووته‌)ی‌ سه‌ر به‌ قه‌زای‌ پێنجوێن ده‌بێ و له‌وێش مزگه‌وت و گوند ئاوه‌دان ده‌كاته‌وه‌و یه‌كه‌م مه‌دره‌سه‌ی‌ وانه‌ وتنه‌وه‌ش داده‌نێ و چه‌ند فه‌قێیه‌ك له‌ خه‌ڵكی‌ گوندو ده‌ره‌وه‌ی‌ گوند لێی كۆ ده‌بنه‌وه‌، وه‌ هه‌روه‌ها به‌هۆی ئه‌وه‌ی‌ ئه‌و سه‌رده‌مه‌ی‌ مامۆستا كه‌ له‌ گوندی‌ "بناوه‌سووته‌" داده‌مه‌زرێ، سه‌رده‌می‌ شۆرش و كێشه‌و نه‌هامه‌تیه‌كان بووه‌، وه‌ گونده‌كه‌ش له‌سه‌ر سنووری‌ نێوان عێراق و ئێران بووه‌، به‌و هۆیه‌وه‌ خه‌ڵكێكی‌ زۆر رێیان له‌ گوندی‌ "بناوه‌سووته‌" ده‌كه‌وێ و مامۆستا ئه‌حمه‌دیش به‌ هه‌لی‌ ده‌زانێ و وه‌ك دۆست و خۆشه‌ویستانی‌ ده‌یگێرنه‌وه‌ كه‌ زۆر بوێرانه‌و راستگۆیانه‌ "باسی بیروباوه‌ری‌ ئیسلامیی بۆ دانیشتوانی‌ گوندو ئه‌و خه‌ڵكانه‌ی‌ كه‌ به‌شداربوون له‌ وتاری‌ هه‌ینیی مامۆستادا" كردووه‌و به‌ توندی‌ وه‌لاَمی‌ شیوعیی و مولحیده‌كانی‌ ئه‌و سه‌رده‌مه‌ی‌ داوه‌ته‌وه‌و زۆر چاو نه‌ترسانه‌ به‌رگری‌ له‌ ئیسلام و پیرۆزییه‌كانی‌ ئیسلام كردووه‌، وه‌ نزیكه‌ی‌ (2) ساڵ زیاتر له‌ گوندی‌ "بناوه‌سووته‌" ده‌مێنێته‌وه‌..

- دواتر به‌ره‌و مزگه‌وتی‌ (قازی‌) شاری‌ پێنجوێن كۆچ ده‌كاو له‌ وێش نزیكه‌ی‌ (3) ساڵێك زیاتر ده‌مێنێته‌وه‌و ده‌ورو كاریگه‌رییه‌كی‌ بێ وێنه‌ ده‌بینێ و له‌ ڕووی‌ رۆشنبیری‌ ئایینییه‌وه‌ به‌ ته‌واوه‌تی‌ كاریگه‌ری‌ له‌سه‌ر دانیشتوانی‌ سنووره‌كه‌ درووست ده‌كات..

- دواتر ده‌گه‌رێته‌وه‌ زێدی‌ خۆی له‌ شارۆچكه‌ی‌ خورماڵ له‌ مزگه‌وتی‌ مامۆستا مه‌لا عبدالله گوڵپی ده‌ست به‌كار ده‌بێ. له‌سه‌ره‌تای‌ ساڵه‌كانی‌ 1980 ز.

- پاشان ماوه‌ی‌ (5 تا 6) مانگێك ده‌چێـته‌ مزگه‌وتی‌ گه‌وره‌ی‌ شارۆچكه‌ی‌ (سه‌یید صادق) و له‌وێش سه‌رقاڵی‌ خزمه‌ت و بانگه‌وازی‌ ئیسلامی ده‌بێ.، جه‌نابی مامۆستا مه‌لا حه‌سه‌ن به‌گی‌ نه‌وێ‌ ده‌یگێرێته‌وه‌و ده‌ڵێ: مامۆستا مه‌لا ئه‌حمه‌د ئه‌و ماوه‌یه‌ هه‌موو رۆژانی‌ هه‌ینیی‌ ده‌هاته‌ سه‌ییدصادق و وتارو نوێژی هه‌ینی‌ پێشكه‌ش ده‌كردین.  

- له‌ كۆتایی ساڵه‌كانی‌ 1980 ز، به‌ ماڵه‌وه‌ ده‌چێته‌ شارۆچكه‌ی‌ سیروان و له‌وێش له‌ مزگه‌وتی‌ (صلاح الدین) نیشته‌جێ ده‌بێ، له‌م مزگه‌وته‌ش كاریگه‌رییه‌كی‌ بێ وینه‌ی‌ بینی‌ له‌ تێگه‌یاندن و پێگه‌یاندنی‌ موسوڵمانان، به‌راستی‌ به‌ره‌كه‌تێك له‌ كاری‌ رێكخستنی‌ ئه‌و كات و ساتانه‌ی‌ سه‌رده‌می‌ شارۆچكه‌ی‌ سیروان هه‌بوو، هه‌رگیز دووباره‌ نابێته‌وه‌، جارێكیان برایه‌ك به‌ناوی‌ (كاك حمه‌عارف) دۆست و خۆشه‌ویستی‌ مامۆستابوو له‌سه‌رده‌می‌ زێرینی‌ سیروان، هاته‌ خزمه‌ت مامۆستا مه‌لا ئه‌حمه‌د كاكه‌ مه‌حموود له‌ شاری‌ هه‌ڵه‌بجه‌و له‌ بینایه‌ی‌ ڕاگه‌یاندنی‌ بزووتنه‌وه‌ دانیشتبوون، ئیتر ئه‌و سه‌رده‌مه‌ سه‌رده‌می‌ شكۆمه‌ندی بوو بۆ مامۆستا ئه‌حمه‌د، چونكه‌ ده‌سه‌لاَت و توانای‌ سه‌ربازییان هه‌بوو له‌ ناوچه‌كه‌دا، مامۆستا ئه‌حمه‌د به‌ كاك حمه‌عارف ده‌ڵێ: گه‌ر له‌و دونیا خوای‌ په‌روه‌ردگار پرسیاری‌ ئه‌وه‌م لێ بكات چ سه‌رده‌مانێكت به‌لاوه‌ شیرین و خۆشتر بووه‌، بێ وه‌ستان وه‌لاَم ده‌ده‌مه‌وه‌و ده‌ڵێم ته‌نها سه‌رده‌می‌ سیروان..! كۆمێنت بۆ خوێنه‌ری‌ ئه‌م وه‌لاَمه‌ی‌ مامۆستا ئه‌حمه‌د به‌جێ دێڵم..! 

- هه‌ر له‌و ساڵه‌شداو له‌ هه‌مان شوێن جه‌نابی مامۆستا به‌فه‌رمی‌ ده‌بێته‌ وتاربێژی مزگه‌وتی‌ گه‌وره‌ی‌ شارۆچكه‌ی‌ سیروان، له‌ كۆتایی ساڵه‌كانی‌ 1980 ز.. به‌ یه‌كه‌مین مزگه‌وتێك داده‌نرێ كه‌ مامۆستا مه‌لا ئه‌حمه‌د كاكه‌ مه‌حموود تیایدا گه‌شه‌ی‌ فیكریی و مه‌عنه‌ویی كردو بوویه‌ كه‌سایه‌تیه‌كی‌ به‌رچاوو ناسراو.. به‌هۆی كاریگه‌ری‌ وتاره‌كانی‌ مامۆستاوه‌ له‌زۆربه‌ی‌ شارو گونده‌كانی‌ كوردستانه‌وه‌ خه‌ڵكی‌ ڕوویان له‌و مزگه‌وته‌ ده‌كرد.. وه‌ مامۆستا زۆر چاو نه‌ترسانه‌ به‌ بوێرییه‌كی‌ زۆره‌وه‌ وته‌ی‌ حه‌ق و به‌رگری‌ له‌ دین و ئه‌خلاق و پیرۆزییه‌كان ده‌كرد، جه‌نابی مامۆستا له‌مزگه‌وتی گه‌وره‌ی سیروان ڕۆلێكی گه‌وره‌ی هه‌بوو له‌ وشیاركردنه‌وه‌ی خه‌ڵك چ به‌ گوفتار چ به‌نووسین، نوسینه‌كانی مامۆستا له‌ سه‌رانسه‌ری‌ كوردستان خوێنه‌ریان هه‌بوو، وتاره‌كانی له‌ رۆژانی هه‌ینیی هانده‌رێكی گرنك بوو بۆ هاندان و ئاماده‌كردنی موسڵمانان بۆ راپه‌رینه‌ جه‌ماوه‌ریه‌كه‌ی (11/5 /1987) كه‌ مامۆستا به‌و په‌ڕی لێهاتوویی له‌ سیروان و هه‌ورامان خۆیان بۆ ئاماده‌كردبوو.

- پاشان له‌ سه‌ره‌تای‌ دوای‌ ساڵی‌ (1980 ز) له‌ نێوان مزگه‌وتی‌ صلاح الدین و مزگه‌وتی‌ گه‌وره‌ی‌ سیروان، له‌ ته‌نیشت قوتابخانه‌ی‌ ڕه‌نگینی‌ ئه‌وكات، بینایه‌ك هه‌بوو كه‌ جێگای‌ خواردنه‌وه‌و بێ ره‌وشتی‌ به‌عسییه‌كان و هاوشێوه‌كانیان بوو، ماوه‌یه‌ك بوو چۆڵكرابوو، بۆیه‌ مامۆستا ئه‌حمه‌د به‌ هه‌لی‌ زانیی و له‌ رێی دڵسۆزان و خه‌مخۆرانی ئه‌وكاتی‌ رابوونی ئیسلامییه‌وه‌ خێرا ده‌ستیان دایه‌ نوێكردنه‌وه‌و جوانكاری بیناكه‌و له‌ ماوه‌یه‌كی‌ زۆر كه‌مدا ناوی‌ (مزگه‌وتی‌ سومه‌یه‌)ی‌ له‌سه‌ر نووسراو له‌و مزگه‌وته‌ش به‌ باشی له‌بیرمه‌ كه‌ چه‌نده‌ مامۆستاو هاورێیانی‌ ده‌ورو كاریگه‌رییان هه‌بوو. خوا له‌ هه‌موویانی‌ وه‌رگرتبێ و له‌ مامۆستاش خۆش بووبێ.

- پاشان كه‌ مامۆستا له‌لایه‌ن حكومه‌تی‌ به‌عسه‌وه‌ له‌ وتاربێژی به‌ركه‌نار ده‌كرێ، له‌ گه‌ره‌كی‌ "چرۆسانییه‌كان" له‌ سیروان مزگه‌وتێك درووست ده‌كه‌ن به‌ناوی‌ مزگه‌وتی‌ (عمر كوڕی عبدالعزیز)و له‌وێش به‌ گه‌رم وگوڕی زیاتره‌وه‌ خزمه‌ت به‌ ئیسلام و موسوڵمانان ده‌كات.. خۆم باش بیرم دێ كه‌ مامۆستا وتاری‌ عه‌سران و له‌ ره‌مه‌زانیش به‌ شێوه‌یه‌كی‌ به‌رچاو سه‌رقاڵی‌ ده‌عوه‌و بانگه‌واز بوو. وه‌ گه‌وره‌ترین پاڵپشتی‌ جه‌سته‌یی و مه‌عنه‌وی‌ له‌و كاته‌ ناسكه‌دا كه‌ كوردستان و به‌تایبه‌ت ده‌ڤه‌ری‌ هه‌ڵه‌بجه‌و هه‌ورامان و سیروان پیایدا تێ ده‌په‌ڕی، دوای‌ خوای‌ گه‌وره‌ كه‌ پشت و په‌ناو پارێزه‌ری‌ مامۆستابوو، خزمانی‌ چرۆسانه‌یی و ئاروزه‌ریی و شه‌مێرانیی و هه‌ورامیه‌كان بوون، به‌راستی‌ پارێزه‌ری‌ راسته‌قینه‌و دڵسۆزو چاوكراوه‌ی‌ مامۆستا ئه‌حمه‌د كاكه‌ مه‌حموود بوون، كه‌ من وه‌ك خۆم شاهێدی‌ ئه‌وه‌ ده‌ده‌م كه‌ خزمانی‌ چرۆسانه‌یی زۆر له‌ كه‌س و كاری‌ مامۆستا دڵسۆزترو پارێزه‌ری‌ مامۆستاو خه‌مخۆری بوون.. خوا بیكاته‌ ئه‌جرو پاداشت بۆ هه‌موو دڵسۆزان و خه‌مخۆرانی‌ مامۆستا له‌و سه‌رده‌مه‌دا..

- دواتر هه‌ر له‌به‌ر زوڵم و زۆری ده‌سه‌لاَتدارانی‌ به‌عس مامۆستا به‌شێوه‌یه‌كی‌ كاتی‌ رۆشته‌ گوندی (به‌شاره‌تی‌ خوارو) وه‌ له‌مزگه‌وتی‌ گونده‌كه‌ زۆر بوێرانه‌و دڵسۆزانه‌ سه‌رقاڵی‌ كاری‌ ئیسلامیی و ده‌عوه‌و بانگه‌وازی‌ خوایی بوو.

- له‌ ساڵی‌ 1987 ز، ئه‌وه‌بوو مامۆستایانی‌ ئایینی‌ ناوچه‌كه‌ دوای‌ ئه‌وه‌ی‌ سه‌رده‌می‌ بانگه‌وازو ده‌عوه‌و ئیرشاد كۆتایی پێ دێنن، وه‌ په‌روه‌رده‌یه‌كی‌ تۆكمه‌و پێگه‌یاندن و تێگه‌یاندنێكی‌ باشیان بۆ خه‌ڵكی‌ سنووره‌كه‌ كردبوو، جه‌نابی مامۆستا ئه‌حمه‌د به‌ره‌و ئێران كۆچ ده‌كه‌ن و له‌ ئۆردوگای‌ دزڵی سه‌ر به‌ قه‌زای‌ مه‌ریوانی‌ كوردستانی‌ ئێران نیشته‌جێ ده‌بن و له‌وێش له‌ مزگه‌وتی‌ ئۆردوگای‌ دزڵی كاریگه‌رییه‌كی‌ به‌رچاو ده‌بینێ و له‌ وتاری‌ هه‌فتانه‌و زنجیره‌ وتارێكی‌ تایبه‌ت كه‌ رۆژانی‌ سێشه‌م پێشكه‌شی ده‌كردو هه‌روه‌ها كردنه‌وه‌ی‌ ده‌یان ده‌وره‌ی‌ په‌روه‌رده‌یی بۆ ئه‌وكاتی‌ بزووتنه‌وه‌ی‌ ئیسلامیی..، وه‌ له‌ مزگه‌وتی‌ ئۆردوگای‌ "بارام ئاوا"ش به‌هه‌مان شێوه‌ وتارو سه‌ردانی‌ تایبه‌تی‌ هه‌بوو..

- پاشان كیمیابارانكردنی‌ هه‌ڵه‌بجه‌ له‌ ساڵی‌ 1988 ز، ده‌ستی‌ پێكردو ناوچه‌ سنووریه‌كانی‌ ئه‌ودیوی‌ كوردستانی‌ ئێرانیش پارێزراو نه‌بوون له‌و هه‌ڵمه‌ته‌ ترسنۆكانه‌ی‌ حیزبی به‌عس و كیمیاوی بارانیش گونده‌كانی‌ سنووری‌ گرته‌وه‌و به‌و هۆیه‌وه‌ ئۆردوگای‌ "ده‌ربه‌ند دزڵی"ش له‌ ترسی كیمیاویی و بۆمبارانكردنی‌ چۆڵكرا، ماڵی‌ مامۆستا ئه‌حمه‌د كاكه‌ مه‌حموودیش به‌ره‌و گوندی (گورگه‌یی) سه‌ر به‌ ناحیه‌ی‌ (سه‌ڵواوا) كۆچ ده‌كه‌ن و جه‌نابی مامۆستا ئه‌حمه‌د له‌و گونده‌ش كاری‌ بانگخوازی‌ بیر ناكات و به‌ هه‌لی‌ ده‌زانێ و له‌ مزگه‌وتی‌ گونده‌كه‌وه‌ ده‌ست به‌ بانگه‌وازو رێنمایی خه‌ڵكی‌ گوند ده‌كات.. خۆم له‌ یادمه‌و ده‌نگی‌ مامۆستا له‌ گوێمدایه‌ كه‌ دوای‌ نوێژی‌ عه‌سران هه‌موو رۆژێ وتارو رێنمایی بۆ خه‌ڵكی‌ هه‌بوو.. خوای‌ گه‌وره‌ لێی وه‌ربگرێ..

- بۆ كۆتا جاریش له‌ مزگه‌وتی‌ (منیره‌ الفهد) له‌ هه‌ڵه‌بجه‌ی‌ شه‌هید مزگه‌وتی‌ ئه‌و گه‌ڕه‌كه‌ی‌ ئاوه‌دان كرده‌وه‌و بۆ یه‌كه‌مجار وتاری‌ هه‌ینی‌ له‌و مزگه‌وته‌دا پێشكه‌ش كردو به‌ زنجیره‌ باسێك له‌سه‌ر عه‌قیده‌و بیروباروه‌ی‌ ئیسلامیی ده‌ستی‌ كرده‌وه‌ به‌ وتاردان.. وه‌ تا وه‌فاتیشی له‌ هه‌مان مزگه‌وت پێشنوێژو وتار بێژ بوو.. خوای‌ گه‌وره‌ لێی وه‌رگرتبێت.

شێوازه‌كانی‌ تری‌ بانگخوازیی‌ مامۆستا

مامۆستا مه‌لا ئه‌حمه‌د كاكه‌ مه‌حموود ره‌حمه‌تی‌ خوای‌ لێ بێ، وه‌ك باسمان كرد له‌ ڕووی‌ وتاردان و نووسینه‌وه‌ جێده‌ست و كاریگه‌رییان له‌سه‌ر ئاستی‌ كوردستان دیار بوو، به‌لاَم جه‌نابی مامۆستا ته‌نها له‌و دوو بواره‌دا نه‌وه‌ستاوه‌و، به‌ڵكو له‌ رێگه‌كانی‌ تری‌ وه‌ك: (وانه‌ وتنه‌وه‌ی‌ تایبه‌ت و گشتیی و  پێشكه‌شكردنی‌ به‌رنامه‌ له‌ ته‌له‌فزیۆن و رادیۆو و پاشان له‌ رێی ئینته‌رنێت و هه‌روه‌ها له‌ رێی فه‌توادانیشه‌وه‌) جێ ده‌ست و كاریگه‌رییان هه‌بوو، وه‌ك پێشتر هێمامان پێكرد له‌ پۆسته‌ بانگخوازییه‌كانی‌ مامۆستادا، مامۆستا زۆر به‌تواناو كاریگه‌ر بوو له‌ ڕووی‌ وتاردان و نووسینه‌وه‌، بۆیه‌ له‌ هیممه‌ت به‌رزی‌ خۆیانه‌وه‌و له‌ دڵسۆزییان بۆ ئیسلام و جه‌ماوه‌ره‌كه‌ی‌، ته‌نها به‌و دوو جۆره‌ له‌ بانگخوازیكردن بۆ ئیسلام نه‌وه‌ستایه‌وه‌و به‌ڵكو له‌ رێی رادیۆی ده‌نگی ئیسلام له‌ هه‌ڵه‌بجه‌ به‌رنامه‌ی‌ تایبه‌تییان هه‌بوو وه‌ هه‌فتانه‌ له‌و مینبه‌ره‌شه‌وه‌ حه‌ق و راستی‌ ئیسلام و به‌رنامه‌ دره‌وشاوه‌كه‌ی‌ بۆ گوێگرانی‌ باس ده‌كرد، رادیۆی ده‌نگی‌ ئیسلام رادیۆی مه‌ركه‌زی‌ بزووتنه‌وه‌ بوو وه‌ سه‌رتاسه‌ری‌ كوردستان سوود مه‌ند ده‌بوون لێی، پاشان له‌ رێی په‌خشی ته‌له‌فزیۆنیشه‌وه‌ مامۆستا ده‌عوه‌و بانگخوازی‌ خۆی ده‌كردو له‌ ته‌له‌فزیۆنی‌ مه‌ركه‌زی‌ بزووتنه‌وه‌ له‌ شاری‌ هه‌ڵه‌بجه‌ به‌رنامه‌ی‌ خۆی هه‌بوو، وه‌ ده‌یان چاوپێكه‌وتن و لێدوانی‌ تایبه‌تی‌ له‌ ته‌له‌فزیۆندا هه‌بوو، پاشان كه‌ دونیای‌ ئینه‌رنێت و ته‌كنه‌لۆجیای‌ سه‌رده‌م په‌یدا بوو ئه‌وه‌نده‌ی‌ مامۆستا فریا كه‌وت، له‌وێش نه‌وه‌ستاو ده‌ست و قه‌ڵه‌می‌ خۆی گه‌یانده‌ ئه‌وێ و چه‌ندین بابه‌تی‌ ره‌خنه‌یی و وه‌لاَمی‌ گومانه‌كانی‌ ناحه‌زانی‌ ئیسلامیی له‌ سایتی‌ كوردستان نێت و چه‌ند سایتێكی‌ تر ده‌دایه‌وه‌.، دوای‌ ئه‌وه‌ش كه‌ بوویه‌ به‌رپرسی مه‌كته‌بی بانگه‌وازو دیراساتی‌ ئیسلامیی له‌وێش له‌ رێی گۆڤاری‌ مناره‌وه‌ ده‌یان بابه‌تی‌ جۆراو جۆری فیقهی‌، عه‌قیده‌یی، رۆشنبیری‌ ئیسلامیی بلاَو ده‌كرده‌وه‌، ئه‌مه‌و بێجگه‌ له‌وه‌ی‌ كه‌ له‌ گۆڤاری‌ جه‌ماوه‌ر كه‌ جه‌نابیان خاوه‌نی‌ ئیمتیازی‌ گۆڤاره‌كه‌ بوون، ده‌یان فه‌توای‌ گرنگ و بابه‌تی‌ جۆراو جۆری بلاَو كردۆته‌وه‌، له‌ رۆژنامه‌ی‌ بزووتنه‌وه‌ی‌ ئیسلامییش كه‌ خۆیان خاوه‌نی‌ ئیمتیازی رۆژنامه‌كه‌ش بوون له‌وێش به‌ هه‌مان شێوه‌ ده‌ست و قه‌ڵه‌م ره‌نگین بوون و ژماره‌ نه‌بوو وتارو بابه‌تی‌ مامۆستای‌ تێدا نه‌بێ.، پاشان له‌ هه‌مووی‌ گرنگتر وه‌ك به‌ره‌كه‌تی‌ یه‌كبونی‌ ئیسلامیی كه‌ هه‌ردوو بزووتنه‌وه‌ی‌ راپه‌رین و بزووتنه‌وه‌ی‌ ئیسلامیی كه‌ مامۆستا ئه‌حمه‌د پشكی‌ گه‌وره‌ی‌ هه‌بوو له‌و یه‌كگرتنه‌كه‌دا، له‌دوای‌ ئه‌و یه‌كگرتنه‌ مه‌كته‌بی فه‌توا كتێبێكیان ده‌ركرد كه‌ یه‌كه‌مجار بوو به‌و شێوه‌یه‌ مه‌كته‌ب و ئۆرگانێك بتوانێ‌ به‌و جورئه‌ته‌وه‌ ده‌یان فه‌توای‌ جۆراو جۆر له‌ دوو توێی كتێبێكدا به‌ناوی‌ (چمكێك له‌ فه‌تواكانی‌ مه‌كته‌بی فه‌توا) بلاَوكرده‌وه‌، كه‌ به‌ده‌یان فه‌توای‌ نوێ و گرنگی‌ له‌ خۆ گرتبوو.. خوا لێیان وه‌رگرێ و بیكاته‌ توێشووی‌ قیامه‌تیان. 



   ‌ 3956 جار خوێندراوه‌ته‌وه‌
هه‌موو مافه‌کان پارێزراوه بۆ ماڵپه‌ڕی مامۆستا مه‌لا ئه‌حمه‌د کاکه محمود - ساڵی دامه‌زراندن: 1428 - 1439 / 2008 - 2018
Create By: Telerik For IT Solutions
Facebook