<bgsound src="sher.wav" loop="infinite">
 
هزری مامۆستا
كێشەی گەلی كورد لە دیدی ئەحمەد كاكە مەحممودەوە

كێشەی گەلی كورد لە دیدی ئەحمەد كاكە مەحممودەوە

* لە سۆنگەی ئەوەی كە ئێمە دەمانەوێت بەرنامەو دەستورو شەرعی خوا كاربكاو بروانێتە هەموو پێشهات و مەسەلەكان، قەزیەی كوردیش بەكێشەیەكی ئیسلامیی سەیر دەكەین و پێمان وایە كورد: یەكێ لەو سەدان و هەزاران نەتەوەو گەلانەی دونیایە كەخوا بەرامبەریان دەفەرموێ: ( وجعلناكم شعوبا وقبائل لتعارفوا ان اكرمكم عندالله اتقاكم )، كورد نەتەوەیەكە وەك گشت نەتەوەكانی گێتیی و دەبێ هەموو مافێكمان دیاری بكرێت، دەبێ زمان و كاڵاو باڵایان پەسەند بێت، نیشتمان و فەرهەنگ و كەلتوریان ددانی پێدا بنرێت .
* ئێمە بەلامانەوە ڕەوا نییە هیچ گەل و نەتەوەیەك بچەوسێنرێتەوەو مافی ڕەوای خۆی لێ زەوت بكرێت چونكە – ئەگەر موسوڵمانیش نەبن - وەكو مرۆڤ رێزیان هەیەو دەبێ قەدریان بگیردرێت و بەكەم تەماشا نەكرێن، بۆیە ئێمە دەڵێین: یان ئەوەتا نابێت هیچ گەل و نەتەوەیەك لە دونیای ئیسلامەتیدا – نیوە دوورگەی عەرەبیی و دراوسێكان – ناویان لەسەر نەخشەی جوگرافیای سیاسیی هەبێ و هەر وڵاتەی بۆخۆی دەوڵەتێك بێت، یان دەبێ كوردیش بۆخۆی دەوڵەتێك بێت، وەیان دەبێ ناوی هەموو لەسەر نەخشە بسرێتەوەو هەموویان وشەی (دەوڵەتی ئیسلامی) كۆیان بكاتەوە، بەڵێ لەبنەرەتدا مرۆڤەكان دەبێ گشت برا بن و پێكەوە برایانە دەوڵەت بەرن بەرێوەو جیاوازی نەبێ لەنێوان هیچ نەتەوەیەكدا، ئیسلامیش وا سەیری ئەم دونیایە دەكات، بەڵام ئیستا كە لەت وپەت بووەو پارچە پارچە كراوەو هەر پارچەش سیاسەتی وڵاتێك دەیبا بەرێوە، یان ئەوەتە دەبێ گشت ببنەوە یەك ، یان دەبێ هەموو نەتەوەیەك ناونیشانی خۆی لەسەر نەخشەی جیهانی هەبێ و لەلایەن زلهێزەكانی دونیاوە ددان بە وجودیدا بنرێت .
* خۆئەگەر نەكرێت – لەبەر سیاسەتی دونیای ئەمرۆ – سەربەخۆیی وەرگرێت و دەوڵەتێكی كوردی پێك بهێنرێت، دەكرێ بەشێوەی ویلایات و فیدراڵیەت مافی ڕەوای خۆی بدرێتێ و بەیاساو قانونی فیدراڵییەتی گشتیی جیهان بجوڵێتەوە، سنوورو زمان و بەرهەم و دەرامەتی پارێزراوبێت و خەرج بكرێت بۆ پێویستی دانیشتوانی كوردستان و پاشانیش لەرووی شەریعەتی ئیسلامەوە ئەگەر لەپرۆژەكان زیادەی هەبوو وەلێی دەمایەوە، ئەوسا بدرێتەوە بەحكومەتی مەركەزی، ئەمیش بەشێوەیەكی دادگەرانە بەسەر هاوڵاتیاندا دابەش بكات و كەسی لێ بێ بەش نەكات، واتە: لەو دەرامەتە بەشی هەموو شاروو گوندەكان بدرێت بەدامەزراندنی هاوڵاتیان، بەچاككردنی جادەو رێگاو بان و بەكردنەوەی نەخۆشخانەو قوتابخانەو مزگەوت و هتد بۆیان.. لەگەڵ ئەمانەشدا نابێ پێوەری هاوڵاتی بوون ئینتیمای حیزبیی بێت، بەڵكو تەنیاو تەنیا لەداییكبووی ئەوێ بێ، وەیان بەشێوەی رەسمیی لەلایەن ئەو دەوڵەتەوە رێی پێدرابێت لەو نیشتمانەدا بژی .
* ئێمە لەڕووی بەرنامەی دینی ئیسلامەوە دەروانینە مافی هەموو مرۆڤێك لەم سەرگۆی زەوییەدا بەوشكانیی و دەریاییەوە، پێویستە لەسەر بنەماكانی:( كان الناس أمة واحدة..) تەعامولی لەگەڵ بكرێت، واتە: ئەگەر خەلافەتی ئیسلامیی هەبوو خەمی مرۆڤەكانی گشت دونیا بخوات، بەتایبەتی ئەوانەیان لەژێر ركێفی ئەودان، ئیتر زمان و فەرهەنگ و نەتەوەیان هەرچی ببێت، لەبەر ئەوە لەسنوری ئەودان لەهەموو پێداویستییەكانی سیاسیی و كۆمەڵاتیی و ئابوریی ژیانییان بەر پرسە لەدونیاو لەقیامەتدا، هەر لەو روویەوە بوو عومەری كوری خەتتاب – كە لەمەركەزی دەوڵەتی ئیسلامیی ئەوكاتەوە لەمەدینە دەیگوت: كارژەلەیەك پێی هەڵكەوێت لەبەردێك لەدیجلەو فوراتدا عومەر بەرپرسە، چونكە ئەو چووەتە ژێر پاراستنی باری سیاسیی و كۆمەڵایەتیی و خۆشگوزەرانیی پێكهاتەی ئەو دەوڵەتە، ئیسلام تێی گەیاندبوو لەبن یاسای ( كلكم راع وكلكم مسئول عن رعیته ) هەركەسێك لەناو تەواوی خەڵكانی دەوڵەتەكەیدا برسی بێت، ئەو بەر پرسە، هەربۆیە لەساڵە نەهاتەكاندا خەلیفەی موسوڵمانان گۆشتی چەوری لەسەر خۆی حەرام كردبوو ، هەربۆیە لەكاتی وشكەساڵیی و گرانیدا یاسای دەستبرینی دزی راگرت .
* ئێمە پێمان وایە دەرامەت و بەرووبومیی وڵات بەپلەی یەكەم حەقی ئەوانەیە دەرامەتەكەی تێدا پەیدا دەبێت، واتە: هەتا هاوڵاتیانی ئەو جێگایە پێویستیان پێی هەبێت، نارەوایە بنێردرێ بۆجێگایەكی تر، (عومەری عبدالعزیزیش) رەحمەتی خوای لێ بێت لەو سەردەمەدا كە زەكاتیان كۆ دەكردەوە لەو ئەفریقایەدا كەبەدەست گرانیەوە بەگیرهاتووە، عومەریان ئاگادار كرد كە : ئەفریقیا هەژارو بێ نەوایەكی ئەوتۆی تێدا نەماوە كەزەكاتی پێ بشێت، ئایا چی لێ بكرێت؟! ئەویش لەرووی فیقهی ئیسلامیەوە فەرمووی: بگەرێن بزانن كێ قەرزارە، كێ لاوەو ناتوانێ ژن بهێنێت، كێ بەكۆیلە ماوەتەوەو ناتوانێت خۆی ئازاد بكات، بیدەن بەوانە..! لەم سۆنگەیەوە دەرامەت و بەرووبومی كوردستانیش بەنەوتەكەی كەركوكیشەوە دەبێ بۆ خەڵكی كوردستان و سنووری ئەو خەرج بكرێت، تەنانەت هەتا كوردستان پێویستی بەپرۆژەیەك هەبێت، رەوا نییە بدرێت بەحكومەتی مەركەزیش، چ جای دەوڵەتانی نەیارو زلهێزو داگیركەران.

 ئەمە كورتەو پوختەیەك بوو لەتێروانینی ئەحمەد كاكە مەحموودەوە بۆكێشەی كوردو گشت گەلانی دیكە .

                                وصلی الله وسلم علی نبینا محمد وآله
   ‌ 7018 جار خوێندراوه‌ته‌وه‌
09/03/2014

123
هه‌موو مافه‌کان پارێزراوه بۆ ماڵپه‌ڕی مامۆستا مه‌لا ئه‌حمه‌د کاکه محمود - ساڵی دامه‌زراندن: 1428 - 1439 / 2008 - 2018
Create By: Telerik For IT Solutions
Facebook